ప్రేమ  ..
పిడుగు పడినా .. చెక్కు చెదరని ఆలయ ధ్వజంలా ...
సంవత్సరాలైనా చెరిగిపోని ఓ గుర్తులాగా ...
శరీరాలు ఛిద్రమైనా .. అంతమవని "ఆత్మ"లాగా ...
ఆ భగవంతునిపై కలకాలం ఉండే భక్తి , విశ్వాస్సాల్లాగా ..
నిరంతరం ప్రకాశించే సూర్యునిలాగా ..
ఎప్పటికీ నిలిచే ఉంటుంది ..
యుగములు గడిచినా అంతరించని  "అస్తిత్వాన్ని " ఇమిడి ఉంటుంది !!

-మీ లక్ష్మి 

ఎవరి జీవితం వారికి బరువు కాదు ...
చనిపోయేంతవరకు .. " తీరుస్తూ ఉండవలసిన బాధ్యత "
ఆ దేవుడు మనకి అందించిన బాధ్యత ...
అందుకే కష్టాలు రాగానే .. జీవితాన్ని బరువనుకోకు ..
కర్తవ్యమేదో నెరవేర్చాలని తెలుసుకో ..
కాగల కార్యమెదో ఉందని తెలుసుకో ..
ఆ కష్టాలను కడతేర్చుకో !!
జీవితమనే ప్రయాణాన్ని రసవత్తరంగా మార్చుకో !!

-మీ లక్ష్మి 

ఉన్నన్నాళ్ళు నీ విలువ తెలియదు ...
తెలిసినాక నీ జాడ వారికి కానరాదు ...
అందుకే అన్నారేమో  "అదృష్టం ఒకసారే తలుపు తడుతుందని "
ఆ అదృష్టం "నీ తోడు వారికి ఉండటం "
దురదృష్టం .. "నీ నీదైనా కానరాకపోవటం "
"దుర్ " అనే ఈ అక్షరం ఎంత చేటో చూశావా  ??
ఆ వ్యక్తి తనకు తానే ఆహ్వానించాడని / ఆహ్వానించిందని  పసిగట్టావా  ??
ఆతని / ఆమె  స్వకర్మానికి నీవు కారణం కాదని తెలుసుకొన్నావా ??
"లేదు" అనేది నీ సమాధానం అయితే ...
నీ కళ్ళు తెరచి .. నిజం తెలుసుకో .. !!
దోషం నీది కాదని అనుకో !!!

-మీ లక్ష్మి 

ఉదయాన్నే ప్రశాంతత దొరికితే ...
రోజంతా బాగుంటుందంటారు ...
అది కరువైతే మరి ??
రోజంతా బరువవుతుండా ??
అలా నేననుకోను ...
జీవితంలో ఏ రోజునీ మోడులా మారనివ్వను !!

-మీ లక్ష్మి 

ఎంత ఎదిగినా ..
ఒదిగే ఉంది సమాజం ...
ఎంతలా అంటే ఆడదానిపై వివక్షను చూసి ఊరుకునేలా !!
ఈ విషయంలో ఒదిగి , అణిగిమణిగి , చేవ లేకుండా ఉండటం ..
మంచిదేనా?
ఆలోచించండి !!

-మీ లక్ష్మి 

అమ్మలో "ఆ" అంటే  "అభిమానం "
ఆలిలో "ఆ " అంటే "ఆసరా "
మొత్తంగా "ఆడది " లో  "ఆ "  అంటే .. "ఆపేక్ష -ఆప్యాయత "

-మీ లక్ష్మి 

ప్రశంస నాకొద్దు ...
ఎందుకంటే ...
అలవాటు లేనిది అనుకోకుండా వచ్చిపడితే ...
ఆశ్చర్యం కదూ !!

-మీ లక్ష్మి 

"బ్యాటరీ " అయిపోయే ...
ఒక నవ్వుతో  "ఛార్జ్ " చేయుమా !!
అలసట వలన  "డల్" అయినాను ..
"టీవీ ఛానెల్ "లా కాస్త వినోదం చూపుమా !!
రోజంతా "బోర్"గా గడిపా ..
"మ్యూజిక్ ప్లేయర్ "లా ... పాటలతో అలరించుమా ..
"అన్నీ నేనేనా.. మరి నీవేం కావా ??" అంటావా ??
...
నీ గుండెలకి ఊపిరి నేను ...
నీకు బాసట నేను ..
నీకు "అన్నీ " నేను !!
"నీవే .. నేను" !!

-మీ లక్ష్మి 

పసి పాపలోని  అమాయకత్వం ..
నీ నవ్వులో చూసి ..
చెలిమి చేయమని ..
నా మనసు చెప్పింది ..
చేయి కలిపాలే .. మాటా కలిపాలే ...
మాటా మాటా కలిసి ...
గూడుపుఠాని ఏదో చేసి ..
మనసులోని ప్రేమని తట్టి లేపగా ..
పెదవి ఆ మాట చెప్పలేక ...
ఒక పాటై .. చిరు పాటై ..
బయటపడెనే ....
ఆ పాటలోని అంతరార్ధం నిన్ను చేరెనో లేదో ...
తెలియలేదాయెనే ...
జాబు చెప్పవా ..!!
నాకు చేరువవ్వవా !!!

-మీ లక్ష్మి 

కలా !!
"ప్రేమ" అనే అందమైన  లోకం నాకు చూపి ...
నిదురలో ఉన్న నన్ను ..
ఆనంద సాగరాన ముంచి ..
కన్ను తెరవగానే మాయమయ్యావే !!!
ఒక సారి మళ్ళీ  రారాదూ !!
సంతోషమనే బహుమతి నాకివ్వరాదూ !!
ఊరించి అలా వెళ్ళిపోతే ఎలా??
అల్లిబిల్లిగా రావే నా కలా !!!

-మీ లక్ష్మి 

అడవిలో  తప్పిపోయా !!!
బయటకి  రాగలిగాను ...
నీట మునిగిపోయా !!!
తేలగలిగాను ...
దెబ్బలెన్నో తిన్నా !!!
కోలుకోగలిగాను ...
నష్టాలెన్నో చవిచూశా !!!
తేరుకోగలిగాను ...
కన్నీరు ఏరులై పారుతుండగా చూశా !!!
రేపు అవేలే "ఆనందబాష్పాలు " అనుకున్నాను ...
..,
కానీ  నీ ప్రేమను గెలవలేకపోయాను ...
నన్ను కలచివేసిన ఓటమదేను ...
నా జీవితంలో వెలుగు  ఇక నేను చూడలేను !!

-మీ లక్ష్మి 

నీ బాగు కోరేవాడు...
నిన్ను ఎక్కువ పొగడడు..
నీ తప్పులు నిస్సిగ్గుగా ఎత్తి చూపుతాడు..
అలాంటి వాడు.. నీకు మార్గ దర్శకుడు ..
విజయపథంలో నిన్ను నడుపుతాడు!!

-మీ లక్ష్మి

ఖద్దరు చొక్కాలు వేసుకుంటారుగా...
మసి పట్టేస్తాయని...
దుమ్ము ఏదైనా ఉంటే ..
అది పక్క వాళ్ల మీద మాత్రమే పోస్తారు!!
... 
క్లీన్ యండ్ గ్రీన్ పాలసీ మరి!!

- మీ లక్ష్మి

ఈ లోకంలో అందరికీ నచ్చేది " బిజినెస్"
అన్నిటిలోనూ .. అదే వెతుక్కుంటున్నారు..
బంధం అయినా.. బంధుత్వం అయినా..
పని అయినా.. బతుకైనా..
"ప్రయోజనం" లేకుంటే.. అన్నీబలాదూర్..!!

"బిజినెస్ మైండెడ్ పీపుల్" మరి...

-మీ లక్ష్మి

చిరాకు తెప్పించాలంటే..
ఈ "జలుబు"కి .. వెన్నతో పెట్టిన విద్య..
సతాయించేస్తోంది!!!

పోవమ్మా!! .... పో!!!

-మీ లక్ష్మి

డబ్బుతో అన్ని కొనేయచ్చట!!
ఎవడయ్యా..చెప్పింది..
గూగుల్ లో వెతుక్కోండి.. తెలుసుకోడం చేతకాకపోతే..
మనీతో.. అన్నీ నీ కూడా రావు నాన్నా!!!
గుర్తుంచుకో..!!

-మీ లక్ష్మి

ఈ ఫేక్ డిగ్రీల లొల్లేంది??
టైం పాస్ బై అందరికి ..
సోది చెప్పుకోనీకి .. విషయం దొరకబట్టె ..
...
అయిదేండ్లు గింతే..
మనోళ్ళు మారుడు జరగది!!

-మీ లక్ష్మి

దొంగ మరో దొంగని..
"నీవే దొంగిలించింది" అని..
నిందలేసే...
మరి "నీ దొంగతనం సంగతో" అంటే..
నేను దొరకలేదుగా...
"ఇంకా దొరనేలే" అన్నాడుట...
"ఏమి వివరణ"!!!

-మీ లక్ష్మి

కళ్ళు కలపలేక..
కష్టం చెప్పుకోలేక..
లోలోనే దాచుకుందొక వెర్రి మనసు..
బాధను దాచుకొని..
పెదవిని నవ్వుతూ ఉండమంటుంది...
ఆ ఆనతి కాదనలేక..
మోము విచ్చుకుంటుంది...
కానీ .. ఆ నవ్వులో సంతోషం ఏది??
ఆనందం ఏది??
వాటి చిరునామా ఏది? ?

-మీ లక్ష్మి

తన రంగు నలుపే...
కానీ ఆ నలుపే అందం...
కారు మబ్బుల నలుపు తనకి అరువిచ్చింది ఆ గగనం...
కానీ ఆ నీల వర్ణం మనసుకి అంటలేదు..
ఆ చల్లని హృదయానిది శ్వేత వర్ణం!!
అది కాదా అసలు సిసలైన అందం!!
....
నీ కన్నులు చూడగలవో లేదో.. తన అంతర్సౌందర్యం!!

-మీ లక్ష్మి

అబద్ధం చెప్పి ...
కొత్త సమస్యలకు ఆహ్వానం పలికిన.. ఓ ఘనుడు అడిగాడిలా.... ....
"నిజం చెప్పడం నేర్పు"
ఏమని చెప్పను...
...
"దానికి నా వద్ద క్లాసులు; పాఠాలు లేవు" అని చెప్పాను!!
పాపం!! నిజం చెప్పడం ఎలా నేర్చుకుంటాడో!!

-మీ లక్ష్మి

పుస్తకాల పురుగుని కాను నేను...
కానీ అందరికీ నేను అలా కనబడుతున్నానుట...
...
పచ్చ కామెర్లు వచ్చిన వారికి లోకమంతా పచ్చగా కనిపిస్తుందిటగా!!!
వారంతా కూడా పుస్తకాలు తెగ తిరగేస్తున్నారేమో!!
అందుకే .. నేను కూడా అలాగే కనబడుతున్నానేమో!!!

-మీ లక్ష్మి

పాలలో తేనె కలిసినట్టు ...
నీలో కలిసిపోయింది మంచితనం..
అందుకేనేమో ... నిన్ను చూసినంతనే..
మంచితనమే కనబడుతోంది..!!
ఆ తీయందనం జగమంతా పంచుతావు కదూ!!

-మీ లక్ష్మి

ఏ లోకంలో నీవు ఉన్నా...
నిన్ను గురుతు చేసుకుని ...
కన్నీటి బిందెలు నింపాలా??
స్నేహానికే అంత్యక్రియలు చేసిన నిన్ను ..
మరచిపోలేము కానీ ..
ఒక్క కన్నీటి బిందువు కూడా వెచ్చించలేము..!!

-మీ లక్ష్మి

సముద్ర తీరాన..
ఇసుక తిన్నెలపై..
నడస్తూ ఉంటే ..
ఆ భానుని కాంతి నీ పై పడి..
నీ నీడను అద్దంలా ఆ ఇసుక చూపగా...
నీ జాడను నాకు చెప్పాలని..
ఆ నీడ తాపత్రయపడగా...
నా చూపులు నీ వైపుకి అడుగులు వేసుకుంటూ వచ్చి. .
నీలో కలిశాయి..
ఇక వేటిపైనా నా చూపులు వాలనంటున్నాయి
ఏ మాయ చేశావో!!
నా కళ్లలో కాంతివై ఉండిపోవో!!

-మీ లక్ష్మి

ప్రయాణం ఈ రోజు మొదలైంది కాదు...
నాకూ ఓ మనసుందని తెలిసినప్పుడే మొదలయింది..
....
ఆ భావన నాకు నీ దర్శనమే కలిగించిందోయ్!! 
ఆపైన "నువ్వు " అనే గమ్యస్థానానికి నా పయనం మొదలాయెనోయ్!!
-మీ లక్ష్మి

సూది మొనలా గుచ్చుకొనే నా గుండెల్లో ...నీ జ్ఞాపకాలు
లేవే మరిచే దారులు!!
అవి గుచ్చుకున్నా... ఆ బాధ కలిగించెలే నాలో తీయని తలపులు!!
అందుకే ..అవి మరవాలని నేననుకోడంలేదు..

-మీ లక్ష్మీ

హోరు గాలికి చెట్టు ఊగినట్టు...
నా మనసూ ఊగిసలాడుతోంది...
కష్టాలకీ... కడగళ్ళకీ...

కానీ ... ధైర్యం అనే కవచం తొడిగి...
సాహసం అనే కరవాలం ఇచ్చి...
"ధైర్యే సాహసే లక్ష్మి" అని సద్దిచెప్పుకున్నాను..

కాదు. . కాదు .. బోథ చేసుకున్నను ..
నా మది ఇప్పుడు ఒక "యుద్ధభూమి"
అదే .. అదే .. జీవితం అనీ యుద్ధభూమిలో..
ఒడిదుడుకులపై యుద్ధం చేస్తోంది ....
నిరవధికంగా పోరాటం సాగిస్తోంది!!!

-మీ లక్ష్మి

నీ కళ్ళు ..
దాచుంచాయే ఏదో గుట్టు ..
చేస్తున్నాయి కనికట్టు ..
ఆ కళ్ళు దాచిన గుట్టు ..
పెదవులతో బయట పెట్టు ..
..
ఎన్నాళ్ళు దాచుంచుతావ్ !!
నన్నెందుకు వేధిస్తావ్ !!
..
నీ భావాలను నా ముందు పెట్టు ..
చాలించవా నీ బెట్టు ..
ఈ దూరాన్ని.. ఇక  కట్టిపెట్టు .. !!

-మీ లక్ష్మి

కథ ఏదో మొదలయినది ..
నీతో ..
నీ రాకతో ..
ఆ కథకి  సుఖాంతం ..
మన కలయికతో ..
మరి నాకు ఆ అదృష్టాన్ని ఇస్తావో లేదో ..
మన ఈ కథకి అనువైన ముగింపు దొరుకునో లేదో ..
"ప్రేమ" అను ఈ కథకి ఆ దైవం  "శుభం " పలుకునో లేదో .. !!

-మీ లక్ష్మి

కులం అన్నది దేవుడిచ్చినది కాదోయి ..
మతం అన్నది శాంతికి అడ్డోయి ..
మరి ఎందుకు మనకు ఈ కుల మతాలోయి ..
బేధాలు మరచి జీవించాలోయి ..
ప్రేమ , శాంతులను వ్యాపింపజేయాలోయి !!

-మీ లక్ష్మి 

గాంధీ పోరాడి సాధించిన దేశం 

నెహ్రు పాలించిన దేశం 

ఎందరివో  బలిదానాలను చూసిన దేశం 

సస్యశ్యామలమైన దేశం 

పుణ్య నదులు విలసిల్లే దేశం 

హిమ గిరి శిఖరం కలిగున్న దేశం 

పుణ్య క్షేత్రాలు కొలువున్న దేశం 

సంస్కృతి సంప్రదాయాలకు నెలవైన దేశం 

వేదములతో అలరారిన దేశం 

గొప్ప చరిత్ర కల దేశం 

ఇట్టి నా దేశానికి వందనం .. 

అభివందనం .. 

పాదాభివందనం !!!

-మీ లక్ష్మి 

పల్లవించు  స్వరముల కలయిక .. పాట
శ్రుతి లయల సంగమమే పాట
ఆనందం , ఆహ్లాదం కలిగించేది పాట
హృదయం లోతుల్లో కలిగే స్పందన పాట
సాహిత్యం సంగీతం మేళవించినది  పాట
త్యాగయ్య గొంతులో అలరారినది పాట
భాషా అంతరాలు , బేధాలు లేనిది పాట
సముద్ర కెరటాల ధ్వని పాట
మలయ మారుతం చేసే సుమధురమైన శబ్దమే పాట
వసంతంలో కోకిల గానమే పాట
అన్నమయ్య పద సింగారమే పాట
హృదయంతరాళను కదిలించేది పాట
పశు పక్షాదులను కూడా పులకరింపజేసేది పాట
జీవితంలో ఆహ్లాదాన్ని నింపేది పాట
పెదవుల నుండి వెలువడే అద్భుతమైన పదజాలమే పాట
భగవంతుని చేరేందుకు సులభమైన మార్గం పాట !!

-మీ లక్ష్మి 

ఒంటరిగా  నాలుగు గోడల మధ్య ఉన్నప్పుడు ..
నాలుగు గోడలు కూడా  నేస్తాల్లాగా  కనిపిస్తాయి ..
మీ మాటలకి  .. మీ చేతలకి ..
సాక్షీ భూతాలుగా  నిలుస్తాయి !!
మనిషిలా .. మిమ్మల్ని దెప్పి పొడవలేవు ..
మిమ్మల్ని బాధపెట్టలేవు ..
అందుకే .. నీ బాసలేవో ఆ గోడలతో చేసుకోవోయ్  ..
ఊసులేవో వాటికే చెప్పుకోవోయ్ !!

-మీ లక్ష్మి 

నిజాన్ని కప్పిపుచ్చడం ఎవరి తరమూ కాదు..
ఎందుకంటే.. అది అనంతమైనది..
ఎంత దాచాలని ప్రయత్నించినా..
అది ఒక మూల దాగదు..
ఎదో ఒక రూపం లో బయటకి వస్తుంది...
..
అందుకే మీ మాటలతో మాయ చేసి..
ఏమీ సాధించలేరు...
విశ్వమంత నిజాన్ని దాచలేరు!!!

-మీ లక్ష్మి

పంతాలకు పట్టింపులకు..
ఇచ్చే విలువ..
బంధాలకు.. బాంధవ్యాలకు..
ఇస్తే..
ఎన్నో బంధాలకు అంతం ఉండబోదు..
ఎంతో మంది బతుకులు ఛిద్రమూ కాబోవు..

...
కానీ మనిషికి సాటి మనిషి అక్కరకు రాడుగా!!!

-మీ లక్ష్మి

జీవితంలో ఎపుడైనా మళ్ళీ నువ్వు కనబడితే
.
.
.
.
.
.
.
.
..
.
.
.
.
.

.
.
.

.
నీకు ధన్యవాదాలు తెలుపుతాను..
...
ఓటమివి కదా...!!
నాలో ఏ చోటైనా అహం దాగుంటే..
గర్వం నన్ను తప్పు దారి పట్టిస్తే..
నన్ను మేలుకోలుపుతావని..!!!

-మీ లక్ష్మి

భానుడి ప్రతాపాన్ని చూసి..
మానవ జాతి పడుతున్నకష్టాలు చూసి..
మేఘాలకి మనసు కరిగి...
వాన కురిపిస్తున్నాయి..!!
..
ఆ వాన చినుకులు ఈ నేలపై పడి..
ఈ వేసవి తాపాన్ని చల్లబరుస్తున్నాయి..
..
బాగు బాగు..
..
"కానీ రోడ్లు, నాలాలు చెడిపోతున్నాయి"..
అని గగ్గోలు పెడ్తున్నారంతా!!!

అవ్వ కావాలి..బువ్వకావాలి అంటే..
ఎలాగండి??

-మీ లక్ష్మి

నన్ను శ్లాఘించే అవసరం లేదు..
నా అవసరం నీకుంటే..
..
నాకు నోరు తెరిచి చెబితే చాలు..
నేను చేయగలిగినదే అయితే..
చేస్తా..
లేదంటే "నా వల్ల కాదు" అని సమాధానమిస్తా!!
డొంక తిరుగుడు అక్కరలేదు!!
..

-మీ లక్ష్మి

ఈ బాహ్య శరీరానికి దెబ్బ తగిలితే..
అయ్యో అని..
ఉసూరుమని..
మందు రాస్తారే....!
మరి పైకి కనపడని ..
మనసు తట్టుకోలేని..
గాయాలు అయితే..
ఒక్కరూ ముందుకి రారే...!
....
అవునులే ..
ఆ గాయాన్ని తెలుసుకొనే మనసుండాలిగా!!
అది ఎంతో మందికి ఉండదు మరి!!

-మీ లక్ష్మి

రాయడానికి అర్హత అక్కర్లేదు. ..
గుండె లోతుల్లో మధురమైన భావాలు. .
మరియు ఆలోచనలు. .
అవి ఉంటే చాలు. .
భాషలోని మార్దవాన్ని అర్థం చేసుకునే మనసు ఉంటే చాలు..

-మీ లక్ష్మి

మీ గోల మీదే గానీ..
మరో విషయం పట్టదు.
ఏమిటో ... మనసు ఉన్నా అది స్పందించదు...
మరలు కాదుగా మీరు!!
మరి ఏంటిలా???

-మీ లక్ష్మి

జీవనాడి మీరే నాకు..
మీ స్నేహమే వరం నాకు..
ఇలా చెబుతూ పోతే..
పదాలు నిండకుంటాయేమో..!!
అందుకే ఇంతటితో ఆపేస్తున్నా ..
మీతో నా బంధాన్ని మాటల్లో చెప్పలేనని అంటున్నా..

-మీ లక్ష్మి

చరిత్రలు.. చట్టుబండలు..
ఇవి చెప్పుకునే బతికేస్తున్నారంతా..
ఇప్పడు మీరేంటో చెప్పండయ్యా...
పురాతన కాలంనాటివి వెలికితీసింది చాల్లే!!

-మీ లక్ష్మి

ఇదివరకెరుగని వ్యక్తి పరిచయం ..
వరమైనా కావచ్చు .. శాపమైనా కావచ్చు ..
అది వరమైనా .. శాపమైన ..
రెండూ ఇచ్చేది  ఒక్కటే .. "అనుభవం "

-మీ లక్ష్మి 

మాంసాహారం ..
శాఖాహారం ,,
వాటి సమాహారం ..
మనుషుల ఆహారం ..
ప్రతి వారిదీ ఒక నిర్దిష్టమైన ఆహార నియమం ..
ఏదైనా .. భుజించేది మనం జీవించటం కోసరం ..
మరి వాటి గురించి ఎందుకీ ఝంఝాటం ??
ఎందుకు ఒకరి  అలవాటుని ఒకరు విమర్శించడం ??
ఇది ఓ గందరగోళం ...
ఈ గందరగోళానికి కారణం .. కేవలం  మనిషి సంకుచితత్వం !!

-మీ లక్ష్మి 

నీ మతం నీకు సమ్మతం ,,
పర మతాన్ని అవహేళన చేయుట కాదు సమంజసం ...
ఏ మతమైనా ఏకత్వం .. అదేగా  మానవత్వం !!
మతము కావాలో ... మానవత్వము కావాలో .. మీదే నిర్ణయం !!
మీ నిర్ణయం కావాలి నర జాతికి ఆదర్శం !!
పక్కన బెట్టు నీ మదం ...
పెంపొందించు మత సామరస్యం !!

-మీ లక్ష్మి 

ప్రేమ ..  స్వర్గమే
అది సఫలమైతే ...
ప్రేమ నరకమే
అది విఫలమైతే ...
కానీ ఆ స్వర్గమో .. నరకమో ..
ఇచ్చేది ప్రేమ కాదు ..
అది అందించేది  నువ్వు ప్రేమించిన  మనసు..
ప్రేమ కేవలం ఆ రూపు సంతరించుకుంటుంది ..
అద్దంలా ఆ భావనని ప్రతిబింబిస్తుంది !!

-మీ లక్ష్మి

నదిలా ...
ఓ సముద్రంలో కలిసిపోదామని అనుకున్నావు ...
ప్రవహించడం  మొదలు సముద్రము ..
నేనైతే బాగుండు ...
మన ప్రేమ  సంగమం  కాదా  అందరికీ కనువిందు  ..!!
ఆ సంగమానికి సాక్ష్యం అవడా దివిలో భగవంతుడు !!

.. ఇక నీవు నేను ఏకమైతే సంతోషాల అలలు పొంగు !!

-మీ లక్ష్మి 

ఏంతో స్నేహంతో ..
సఖ్యతతో ఉంటే ...
ఏమి దొరుకునో తెలియునా ??
కేవలం ఖేదమే ..!!
అది స్నేహమని నువ్వనుకుంటే ..
నువ్వో ఊతమని వాళ్లనుకుంటే ...
అమాయక  చక్రవర్తిలా ...
నువ్వు వారి బాధ్యత తీసుకుంటే ...
అది తీరిపోగానే ...
నువ్వు అక్కరకి రావే !!
నీ స్నేహం కాదా మరుగే !!
అందుకే ...ఇదిగో మిత్రమా ...
జాగ్రత్తగా  ఉండుమా ...
స్నేహాన్ని  అధికముగా పంచేయమాకుమా !!!

-మీ లక్ష్మి

సుఖముంటే .. సంతోషము ..
లేదన్న దుఖము ..
ఇది మానవుని నైజము ..
అన్నీ  బాగుంటే .. భగవంతుడు  గురుతే రాదు..
కష్టమొస్తే ఆయన్ని నిందించక మానరు ...
ఏ ??
చీకటి పడితే .. ఆ దేవుని తిడతారా ???
లేదుగా ...
మరలా వెలుగొస్తుందని అనుకొరూ !!!
మరి సుఖదుఖాలూ అంతే ..
ఒకదాని వెనుక ఒకటి ఉంటాయి ...
ఒక్కొక్కటిగా  మనని పలుకరిస్తాయి ...
. .
అంచేత ...
ఆ దేవుడిని నింద సేయకండి ...
ఇన్ని హంగులు జీవితంలో ఇచ్చినందుకు  కృతజ్ఞత తెలుపండి ..!!

-మీ లక్ష్మి 

చేతి కర్రతో దేశాన్నే నడిపారు బాపూజీ .. 

ఈనాటి రాజకీయాలు దేఖోజీ ... 

ఎక్కడ చూసినా లాలూచి .. 

ప్రజల కళ్ళకి గంతలు కట్టి .. 

ఆడతారు దోబూచి ... 

ఎన్ని వనరులున్నా ..నిధులున్నా .. 

ఖర్చు పెట్టాలంటే నామోషీ ... పలుకుబడి ఉన్నవారికేలే  ఎర్ర తివాచీ .. 

వాళ్లకు ముఖ్యమైనది  కేవలం పదవితో కూడిన  ఆ కుర్చీ .. 

-మీ లక్ష్మి 

గమనిక.: నాకు తెలిసిన ఒక వ్యక్తి నా ఈ కవితను తన ఫేస్ బుక్  ప్రొఫైల్  లో పెట్టటం జరిగింది .. కావున  ఇది నేను నా స్వహస్తాలతో రాసిన కవిత అని మనవి చేసుకుంటున్నాను !!

నీతో నీవు ..
నిత్యం ఉండవు .. మరి వేరైపోవునుగా నీ ఆత్మ ..
అది మళ్ళి కొత్త నేస్తాన్ని  వెతుక్కుంటూ వెళిపోతుందిగా ..
అపుడు నీతో నీవు లేనట్టే ..
నీ అస్థిత్వం ఇక ముగిసినట్టే ..
జీవం ఉండేవరకే  ఏదైనా ...
కాలం ముగిసాక నీది ఏదైనా .. నీకు మిగిలేనా ??
.....
ఏది శాశ్వతం కాదు ... నువ్వూ కాదు ... నీ కష్టార్జితమూ  కాదు .. నీ బంధాలూ కాదు ..
చివరికి  నీ ఆత్మ కూడా రేపు నీది కాదు ...
అది వేరే జతని కోరక మానదు ...!!

-మీ లక్ష్మి 

నా మది ...
కన్నులకి చెప్పింది ..
నిన్నే చూడమని ..
నీ రూపునే ఊహించుకోమని ..
నేరం నా కన్నులదా ??
మరి చెప్పిన నా మనసుదా ??
మరి నన్నాకర్షించిన నీదా ??
ఏమో తెలియడం లేదే ...
వింతగా ఉందే !!!

-మీ లక్ష్మి 

కలలాగే  ఉంటే జీవితమంతా ...
మరి సత్యానికి అర్థం తెలిసేనా ??
జీవితమూ .. కల .. రెండు వేరు కాదా !!!
ఆ రెంటినీ ఒకటిగా చూస్తే ..
భంగపాటు నీకు అవదా !!!
...
కల నెరవేరితేనే .. అది నిజం ..
లేదంటే అది ఓ అభూత కల్పనం ...

-మీ లక్ష్మి 

ఆకాశం లోని  నిర్మలత్వంలా ఉండే నీ శాంతం  మాత్రమే  భరించగలను ..
సాంతం భరించగలను ... కానీ..
ఉరుములు మెరుపులని పోలిన నీ కోపం నేను సైపలేను ..
ఓర్వలెను ...
అందుకే  కోపం వలదులే ..
నీ నవ్వులే నాకు సిరులులే !!

-మీ లక్ష్మి 

జగానికి ఇవ్వడానికి నా దగ్గర ఏమీ లేక ..
నాలో నేనే కొనసాగించా .. ఒక శోధన ..
దొరికెను నా లోన దాగున్న వేదన ...
అది ఇద్దామా  వద్దా ??  అని మనసు  తనని  తానే ప్రశ్నించుకోగా ...
జవాబొచ్చింది .. "వద్దు " అని ...
ప్రపంచానికి  ఇవ్వాల్సింది  వేదన కాదు .. దుఃఖమూ కాదు ..
"పెదవులపై చిరునవ్వు .. ఈ లోకానికి అందివ్వు "
అని నా మనసు అనగా ...
సంతోషాన్నే పంచుతున్నా !!!
అందరినీ నవ్విస్తున్నా !!

-మీ లక్ష్మి 

చేయి చాస్తే ..సహాయమునకై ..
వారు మరో చేయి చాపుతారు .. "లంచమునకై "..
మరి మన పనులు చేయించుకొనుటకై ..
తృణమో .. పణమో ఇస్తాము !!
వీలయినంత  సమర్పించుకుంటాము !!
ఆ లంచగొండులకి మనమే ఆసరా అవుతాము ...
తప్పు ఎవరిదో నిర్ణయించుకొమ్ము !!
ఇకనైనా మేలుకొమ్ము !!
దేశాన్ని రక్షించుకొమ్ము !!!

-మీ లక్ష్మి 

ఆసుపత్రి ..
రోగ  నివారణకి ..
ఉపశమనానికి దారి ..
ఔనా??
మరి పలు సంఘటనలు కాదంటున్నాయే .
వ్యాపారానికి కేంద్రాలుగా ... ధన సముపార్జనకు మామూలుగా .,
మారుస్తున్నాయని ...
అలా.. భాసిల్లుతున్నాయని ...
చెబుతున్నాయే ... !!
నిజమే లే ..
ఇక వైద్యం వ్యాపారమేలే ...
 కొందరి ధన దాహానికి  ప్రతీకేలే ..!!!

-మీ లక్ష్మి  

నీలొనూ..
నాలొనూ ..
ఉంటుందీ చీకటి కోణం ..
ఎవరూ చూడలేని ..
సులువుగా ఇతరులు కనలేని ..
ఆ రహస్యం ..
అందరికీ అగమ్యగోచరం ..
ఆ చీకటిని ఒక అబద్ధపు వెలుగు మాటున దాచి ..
ఇతరుల నమ్మకాన్ని దోచి ..
పబ్బం గడిపేస్తాం ..
ఆ అంధకారం బయటపడిందో  ..
మనం చేసిన మంచి కుడా చెడే ..
మనం ఇచ్చే తీపి విందైనా చేదే ...!!!

-మీ లక్ష్మి 

మనసు చంపుకొని ..
అజ్ఞాతం లో ఉంటూ ..
దుఃఖాన్ని దిగమింగుతూ ..
కోరుకపోయినా .. అవతలి వ్యక్తితో కాపురముండి ..
జీవం లేక శవంలా బ్రతుకుతూ ..
ఎంతమందో ..
వారి జీవితాల్లో ఉన్న నిజం ఎంతో !!
వారి ఆవేదన ఏంతో !!
 కోరుకున్న జీవితం జాడ లేక పరితపిస్తూ జీవించేవారి జాబితా ఎంతో !!

-మీ లక్ష్మి 

పాపం సినిమావాళ్ళు ..
టైటిల్ దగ్గర్నుంచి ..
సినిమా సీన్ల వరకు ..
అన్ని వివాదాలే ..
కొన్ని పబ్లిసిటి ఇస్తాయ్ ..
కొన్ని కొంప ముంచుతాయ్ ..
ఏదేమైనా.. ఆ వివాదాలు మనం మాట్లాడుకోటానికి విశేషాలు ..
టీవీ వారికి అవి వ్యాపార మూలకాలు !!!


-మీ లక్ష్మి

సినిమాల టైటిళ్ళు ..
వారికి నచ్చినట్టు పెట్టుకుంటే ..
ఏమిటో కొందరి గోల ..
మనోభావాలంటూ సాకులు చెప్పి ..
సినిమావాళ్ళని ఇబ్బందులు పెడుతూ ..
వినోదం పొందుతారు ..
ఇష్టమంటూ ఒకటుంటుందిగా ..
స్వేచ్ఛ కూడా ఉండాలిగా
వారి ఇష్టానికి , స్వేఛ్చకి  కూడా విలువివ్వండి !!!

-మీ లక్ష్మి

అడవిలో సాగుతోంటే ..
దారీ తెన్నూ తెలియకపోతే ..
ఏ జ్యోతి కోసం వెతుకుతామో ..
ఆ జ్యోతి స్వరూపమే గురువు ..
గురువుంటే నీ అభ్యాసం కాదా సులువు ??
ఆ గురువు చరణాలయందే నీకు జ్ఞాన,మోక్షాలు కలవు ..
గురువు లేనిచో ఆత్మ సాక్షాత్కారం ఎన్నటికీ పొందలేవు !!!

-మీ లక్ష్మి

ఒక తెరుకోలేని దెబ్బ తరువాత ..
నా జీవితానికి దొరికిన ఓ ఔషధానివి నువ్వు ..
నాకు నొప్పిని దూరం చేసి ..
నా గుండెకి ఊరటనిచ్చి ..
నను ఒడి చేర్చుకున్నావు ..
ప్రేమను పంచావు ..
..
నీవు ... నీ ప్రేమ
చాలు నాకిక ..
వేరే ఆశలేవి లేవిక !!

-మీ లక్ష్మి 

ఓం కారం లో దాగున్న అక్షరాలు ..
అ , మ కారాలు ..
అమ్మ కి ప్రతిరూపాలు ..
అ అంటే అనురాగం ..
మ అంటే మమకారం ..
ఇంక ఏ బంధమూ అంత పవిత్రమైనది కాదు ..
ఇంకా ఏ సంబంధమూ దీనికి సాటి రాదు ..

-మీ లక్ష్మి 

నోరు తెరిచి అడగలేదు..
మనసులోని మాట నీకు విడమరచి చెప్పలేదు ..
నా అంతరంగంలోకి తొంగి చూసి ..
కళ్ళల్లో దాగిన విషయమే దోచేశావు ..
నా కష్టాన్ని త్రుటిలో నాకు దూరం చేశావు..
దాన్ని సాయం అనుకోద్దు అన్నావు ..
బాధ్యత అనుకోని నా సమస్యను తొలగించావు ..
స్నేహమంటే చేయూత అని తెలియజేశావు ..
నీ స్నేహం నాకు వరంలా తోచేలా చేశావు..

-మీ లక్ష్మి

ఒక పూవు లోని సౌందర్యం ఏపాటిది??
మీ సున్నితం దానికి లేదుగా ..
ఆ ఆకాశం నుండి రాలే చినుకు లోని చల్లదనం ఏపాటిది ??
నీ చూపుల చల్లదనం దానికి లేదుగా ..
దేనితో పోల్చినా ..
నీవేలే నాకు గొప్ప ...
ఇంక ఏ అందం నా కంటికి ఆనదు.. నువ్వు తప్ప !!!

-మీ లక్ష్మి

కరుణ ఎక్కడ ఉంటుందంటే .. 

నీలో .. 

దయ ఎక్కడ దాగుందంటే ... 

నీలో .. 

అన్ని బంధాల్లోని సారం ఎందులో ఉంటుందంటే  .. 

నీలో .. 

మా కష్టాలన్నీ తీర్చే మార్గం ఎక్కడ ఉంటుందంటే .. 

నీలో .. 

ప్రశాంతత ఎక్కడ ఉంటుందంటే .. 

నీలో .. 

మా భక్తి చేరుతుంది నీలో .. 

ఓ భగవంతుడా !!!

మా ఆత్మ చేరేది నీలో !!!

నాకై వేచే నీ కన్నులంటే నాకిష్టం ..
ప్రేమతో నా తల నిమిరే నీ చేతులంటే నాకిష్టం ..
నా త్రోవలో పయనించే నీ పాదాలంటే నాకిష్టం ..
తీయగా నీ పేరును పలికే నీ స్వరం అంటే నాకిష్టం ..
నవ్వుతూ కొంటె సైగలు చేసే నీ పెదవంటే నీకిష్టం ..
అన్నిటికీ మించి నన్ను పదిలంగా దాచుకున్న నీ హృదయం అంటే ..
మరీ మరీ ఇష్టం ..
నీ ప్రేమ పొందిన నా హృదయం అంటే నాకు  ఇంకా ఇంకా  ఇష్టం ..

-మీ లక్ష్మి

ప్రజలు పూజలు చేయాలా ఏంటి మీకు ??
నాయకులు మీరు ..
ఆ భాగావత్స్వరూపాలు కాదు ...
కనుక దివిలో ఉన్నాము అనే భావన వీడి ..
మీపై ఆశలు పెట్టుకున్న..
మీరు ఓటు వేయండి మహాప్రభో !! అని ఒకప్పుడు మొరపెట్టుకున్న ..
మరియు ..
మిమ్మల్ని ఓటు వేసి గెలిపించిన ..
ఈ సాధారణ మనిషికి ..
కాస్తంత సేవ చేయండి ..
ఖద్దరు దుస్తుల తెలుపును కాస్త ..
మీ మనసుకు ఇవ్వండి ..
నల్లటి మీ కుళ్ళు , కుతంత్రాలను ..
మరచి ముందుకు అడుగిడండి !!!

-మీ లక్ష్మి 

నీటిలో పడవలా సాగుతున్న నాకు .. 

తీరం నువ్వు .. 

మధ్యలో సుడిగుండాలు ఎన్ని వచ్చినా

నిన్ను చేరేందుకే నా ప్రయత్నం .. 

నా ప్రయాసలు ఎప్పుడు అయ్యేనో సఫలం ??

నేను నీతో కూడి ఎప్పుడు అవుతానో సంపూర్ణం !!!

-మీ లక్ష్మి 

నా కన్నులకి నిదుర దూరం .. నువ్వు దూరమైతే 

నా చెవులకి సుమధుర స్వారాలన్నీ దూరం .. నీ స్వరమే నే వినకుంటే 

నా పాదాలకి చేరువైనది కూడా దూరం .. నీ జాడ తెలియకుంటే .. 

నా హృదయానికి .. దాని లయ దూరం .. నా మనసు లో నీవు లేకుంటే 

నా జీవితంలో ఉండేది కేవలం శూన్యం .. నీ ప్రేమ నాకు లేకుంటే !!!

- మీ లక్ష్మి 

మీసం మెలేసి .. తొడ కొట్టటం పాత పధ్ధతి ..
అవతలి వారి బలహీనతల మీద కొట్టటం కొత్త పధ్ధతి ..
ఎన్నాళ్ళని మీసం తిప్పి, తొడలు కొడతారు ??

..
విసుగానిపించట్లా ??
ఔనులే .. విసుగొస్తే సినిమాల్లో అవి చుపించినపుడల్లా ..
కాసులు కురిపిస్తారా మన జనాలు ??
అయితే ఒకటి ...
సినిమాల్లో చేస్తే అది వినోదం ..
బయట ఆ కళ ప్రదర్శిస్తే అది .. "అతి " చేయటం ..

-మీ లక్ష్మి

"సీతయ్య .. ఎవరి మాట వినడు " అని ఒక్కరి గురించే అన్నారేం ??
మన దేశం లో అందరూ "సీతయ్య"లు ; "సీతమ్మ" లే ...
అదే .. దేన్నైనా తినద్దు; తాగద్దు అంటే ఎందుకు వింటారు??
వినరు .. విననే వినరు ..
అందుకే కంపెనీలన్నీ "కన్స్యూమర్ ఈజ్ కింగ్ " అంటున్నాయి ..
వినియోగదారుల పిచ్చే శ్రీ రామ రక్ష అని..
ఎక్కడ కన్నెర్రజేస్తే "సేల్స్ " పడిపోతాయేమో అని..

-మీ లక్ష్మి

అద్దరికి చేరేదాకా ...
తప్పదు పయనం
ఆదర్శంగా చేశావో ఆ ప్రయాణం
నీ " అయణం" (నడక) కాగలదు మరో అమర కావ్యం !!

-మీ లక్ష్మి 

ప్రాణం ఇస్తేనే ప్రేమైతే ..
సంతోషంగా ఇచ్చేస్తా ..
మరి నా ప్రాణం ఇమ్మని అడిగిన నువ్వో !!!
ప్రేమ మూర్తివా ??
కాళ రాత్రివా??
నా ఊపిరి తీసి ..
నువ్వుసురు పోసుకోవాలనుకుంటే ...
నీ స్వార్ధపు ప్రేమ నాకొద్దు ..
ఇలాంటి కపట ప్రేమ వద్దే వద్దు

-మీ లక్ష్మి 

ఓల్డ్ ఈజ్ గోల్డ్ అని బాగా నమ్ముతున్నారేమో !!

పాత వాటిని ... కొంగొత్త హొయలతో ..
మళ్ళీ మనకి చూపిస్తున్నారు ...
ఎంతైనా గోల్డ్ కదా ... దీన్నే మెరుగు పెట్టడం అంటార్టలే !!!

-మీ లక్ష్మి

నేను అనుకున్నది సాధిస్తానని ..
గమ్యాన్ని చేరుతానని ..
నాకు తెలిస్తే చాలుగా ..
చాటింపు వేయించాలా ??
పది మందికి  వివరించాలా ??
నాకై ఆ గమ్యం ఎదురు చూస్తోంది ..
దానికి నేను .. నేను దానికి పరిచయముంటే చాలు ..
మధ్యన ఎందుకు అపరిచితులు ??
అంటే .. చుట్టాలు .. పక్కాళ్ళు ..
...
వివరణ ఇచ్చాగా !!!

ఇకనైనా మార్చండి ,మీ పద్ధతులు !!

-మీ లక్ష్మి

నాతో నీకు ..
నీతో నాకు ..
మనలో మనకు ఎన్ని సంఘర్షణలో కదా ..
సంఘర్షణల నడుమ ..
సంగ్దిగ్ధతల మధ్య ..
సాగిపోతున్నాయి మన జీవితాలు ..
ఏమిటో .. అర్ధం కాదు ..
అర్థం కాకపోయినా ..
ఈ జీవితాన్ని గడపాలి ..
చివరి వరకు ఎదురీదాలి !!

-మీ లక్ష్మి 

పైకి ఉబకదు నీరు ఉబికినట్టు ..
మనసులోనే దాగుంటుంది నా ఈ గుట్టు ..
ఆ గుట్టేమితో తెలుసా ??
..
నీ చెంత చేరాలనే నా కోరిక ..
..
ఈ గుట్టు నీతోనే చెప్పానుగా ..
మరేవరికో ఇలా చెప్పలేనుగా ..
..
చేస్తావే బెట్టు??
నన్నే  నీలోన దాచిపెట్టు !!

-మీ లక్ష్మి 

కలలకి అంతుండదు ..
ఆశకి హద్దుండదు ..
ఎందుకో తెలుసా ..
సరిహద్దులు మన పాదాలకి ఆనతాయి కానీ ..
మనసుకి కాదే ..
దాన్ని నిగ్రహించకుంటే ..
ఆ వేగాన్ని ఆపేదెవరులే ..
ఎంతైనా .. చిట్టా పద్దులకి ..
మన లెక్కలకి అందవు ..
మదిలోని ఆశలు ..
చెబుతుంటే తరిగేవా ఆ ఆశల ఊసులు !!

- మీ లక్ష్మి 

నాకు నేనే అన్నీ అనుకుంటే ..
బంధాలు అనబడే ఆ దారాలు మనను ముడివేయకుంటే ..
ఆ బంధనాల విలువ ఎలా తెలుస్తుందిలే ..
అందుకే .. ఆ దేవుడు ఇన్ని బంధాలు ఇచ్చాడు ..
చిక్కు ముడులు వేశాడు .. 
అవి విప్పుతూ ఉండండి ..
అదో సరదా మరి !!

-మీ లక్ష్మి