కష్టం గుర్తించని వాళ్ళకి..
మనసు లేదని..
ఒకరి వెతలను ఎరిగే..
దృష్టి లేదని..
జీవితాలను తలక్రిందులు చేయగలిగే వాళ్ళకి..
ఒక జీవితం విలువ తెలియదని..
కాలమంతా ఒక దానికి ధారపోసి.. శరీరం వంచి..
నిదుర మాని.. చమట చిందించి.. ఒకరు చేసిన పరిశ్రమను అర్థం చేసుకోక.. దానిని నిరర్థకం చేసిన కఠినాత్ములకి..
విలువలు లేవని..
ఇప్పుడిప్పుడే అర్థం అవుతోంది..!!
ఇలాంటి వారి మధ్య ఉంటోంటే.. మనసు బాధ పడుతోంది..!!
- మీ లక్ష్మి
ఒక్కరే..
ఒంటరిగా ఉంటూ..
అలా ఏకాకి బతుకు అలవాటైపోతే..
మాటలాడని గోడలు కూడా..
పలుకులేవో పలికినట్టు అనిపిస్తుంది గమనించారా..??
..
..
మీరు మాట్లాడే ప్రతీ మాట..
చెవులు రిక్కించి అవి వింటున్నట్లు అనిపిస్తుంది..
అలా ఎపుడైనా గమనించారా..??
..
..
మనుషులెవ్వరూ చుట్టూలేనప్పుడు..
మీతో ఉన్న వస్తువులే తోడైపోతాయన్న విషయం గమనించారా..??
..
..
కిటికీల గుండా వచ్చి..
మెత్తగ తాకే ఆ గాలి..
చల్లదనాన్ని పంచి.. కనపడకుండానే "నీ తోడు నేన్నునానుగా నేస్తం" అని స్పృశించి చెబుతుందని గమనించారా..??
..
..
ఆకాశం వైపు చూడండి..
అంతటా ఉండి..
నీ తోనూ ఉంటుంది...!!
వర్షించి తన ప్రేమను చాటుతుంది..!! అది గమనించారా..??
..
..
తీక్షణమైన కిరణాల ప్రసరించే భానుడిని చూస్తే నీపై కోపించినట్టుంటుంది..
సంధ్యా సమయాన ఆయన్ని చూసి ప్రశాంతత చేకూరుతుంది..
అలా కఠినంగా తండ్రిలా విరుచుకుపడి.. తల్లిలా లాలిత్యంతో ఉండి.. మీతో ఉంటాడని గమనించారా..??
..
..
తనపై సేదతీరమని చెప్పి..
మీ బాధలన్నీ తనలో ఇముడ్చుకుంటుందని..
మీరెంత తొక్కినా..మొత్తినా..
సహించేదిగా ఉంటూ...
మిమ్మల్ని సదా అక్కున చేర్చుకుంటుందని గమనించారా..??
..
..
రాళ్ళతో కొట్టిన..
త్రుంచినా..
తన అంగాలైన పళ్ళు పూలను తీసుకు కోసుకొన్నా..
గొడ్డలి వేటుకు తన కొమ్మలను బలి చేసినా..
నేస్తంగానే ఉంటుందని గమనించారా..??
..
..
ఇలా మీతో ఎవరూ లేకున్నా..
చుట్టూ ఉన్నవి మీ నేస్తాలని..
అవి మీతో ఎల్లప్పుడూ ఉంటాయని..
చిరునవ్వునే కానుకిస్తాయని గమనించారా...??
- మీ లక్ష్మి
మనసుకు దగ్గర దానివని...
నా మనసు విప్పి చెబితే...
నా గురించి చెడు ప్రచారాన్ని..
నాకు బహుమతిగా ఇచ్చావు..స్నేహం మీద నమ్మకాన్ని చెరిపేస్తూ..!!
నా ప్రాణం నీదై బ్రతికాను..
నా స్నేహం నువ్వని నమ్మాను..!!
నా తప్పు అదేనేమో...!!
ఆ తప్పుకు శాస్తి ఇదేనేమో..!!
మంచి నాలో బ్రతికుంది...నిన్నేమీ అనవద్దంటోంది..!!
కేవలం నీ నుండి దూరంగా ఉంటూ...
నా మనసుకు "ఇంకెవరిని నమ్మకే" అని చెప్పుకుంటూ...
బ్రతికేస్తా..!!
- మీ లక్ష్మి
బాధ ఎదురుపడచ్చని తెలిసి..
ప్రేమించా...!!
ఆ ప్రేమకి "శుభమస్తు" దీవెనలు రావేమోనని తెలిసి..
ఆ ప్రేమను ఆస్వాదించా...!!
ఆ ప్రేమ "సుఖం" అనే తీరం చేరదేమోనని తెలిసి..
ఆ ప్రేమలోనే మునిగి తేలా...!!
ఇప్పుడు కన్నీరవుతున్నా...!!
ఆ అనుబంధాన్ని అక్కున చేర్చుకోలేక...
దూరమూ చేయలేక...
నిలువునా నివురవుతున్నా...!!
ఏం చేయాలో... ఎటు పోవాలో...??!!
కావలని ఒకసారి.. వదులుకోక తప్పదని ఒకసారి
అనుకొనే హృదయానికి ఎలా సర్దిచెప్పుకోవాలో..??!!
- మీ లక్ష్మి
ఆకాశం బద్దలైనపుడు ఎలా ఉంటుందో...
అలా ఉంటుంది నువ్వు దూరమైనప్పుడు నా గుండె పగిలే శబ్దం..!!
నది కట్టు దాటితే ఆ ప్రవాహాన్ని ఆపలేము...
అలా ఉంటుంది నీ ఎడబాటులో నా కన్నీటి ప్రవాహం..!!
భూమి కంపించినప్పుడు ఎలా ఉంటుందో...
నీవు నన్ను వీడిపోయినప్పుడు అలాగే కంపించిపోతుంది నా జీవితం..!!
..
..
గ్రహణం పడితే వెలుగెలా లేకుండా పోతుందో...
అలా నీ నిష్క్రమణతో నాకు కేవలం చీకటే మిగులుతుంది..!!
నీ దూరం నన్ను ఛిన్నాభిన్నం చేస్తుంది..!!
నీ విరహం నాకు తీరని గాయం చేస్తుంది..!!
- మీ లక్ష్మి
ఒక కలలా..
కనురెప్పల్లో దాగున్న నీవు..
కన్నుల ముందుకొస్తే ఆనందం..!!
కన్నుల ఎదుటున్న నీవు వద్దకొస్తే ఇంకాస్త ఆనందం..!!
వద్దకొచ్చిన నీవు నన్ను కూడి ఉంటే..
అది మరింత ఆనందం..!!
నన్ను కూడి.. జీవితాంతం నన్నంటి ఉంటే..
చెప్పలేనంత ఆనందం..!!
నేను కన్ను మూసేప్పుడు సైతం నా పక్కన నువ్వుంటే..నిన్ను చూస్తూ నేను నేల ఒడిలో ఒరిగిపోతే..
నీ నవ్వు చివరి సారిగా చూసి వెళ్ళిపోతే..
అది నాకు పరమానందం..!!
....
....
మొత్తంగా నీతోనే నా ఆనందం..!!
- మీ లక్ష్మి
నల్లనయ్యవు గోవిందా..
చల్లనయ్యవయ్య గోవిందా..!!
వడ్డీకాసులవాడా గోవిందా..
మా సంపదలొసగేవు గోవిందా..!!
అభయహస్తము గోవిందా..
మాపై ఉంచుమయ్య గోవిందా..!!
నీ పాద పద్మములు గోవిందా..
మాకు శరణము కదా గోవిందా..!!
ఏడుకొండలు ఎక్కి గోవిందా..
నీకు మొక్కినాము సామి గోవిందా..!!
ఏడు లోకాలనేలు గోవిందా..
మమ్ము కాపు కావుమయా గోవిందా..!!
మా సమస్తమ్ము గోవిందా..
నీ చెంతనుంచేము గోవిందా..!!
కలియుగ దైవమువంట గోవిందా..
మా పాపాల హరించు గోవిందా..!!
ఆపదమొక్కులవాడా గోవింద..
మా ఆపదల తొలగించు గోవిందా..!!
బ్రహ్మాండ నాయకుడవు గోవిందా..
నీకు కోటి దండాలు గోవిందా..!!
నీకు శతకోటి దండాలు గోవిందా..!!
- మీ లక్ష్మి
భూమ్మీద పడగానే..
"అయ్యో" అనొక నిరాశావాదం..!!
వినపడుతుంది మనకి..!!
అయితే అపుడే ఊపిరోసుకున్న పసికందు కదా..!!
అది తెలియదు పాపం..!!
అందుకే ఆశగా చూస్తుంది కన్నోళ్ళ వంక..!!
..
..
ఎదుగుతుంటే
దగ్గరకు తీసుకోని తండ్రి..
అయినా ఇంకా మాట రాదుగా..
ఏడుపొక్కటే తోడుంది..!!
అదే తన సమాధానమైంది..!!
..
..
మాటొస్తే..
చిరు పెదవులు "నాన్న" అంటే..
కన్నులతో చూడనైన చూడడు..
ఆ రాతిగుండె తండ్రి..!!
అయినా పిలువడం మానదే ఆ చిట్టి తల్లి..!!
నాన్నంటే అంత ప్రేమ మా నాన్నలుకి..!!
..
..
పెరుగుతోంది నిలువెత్తు అనురాగం లాగా..
చిన్ని తముడొచ్చే ఆ ఇంటి వాకిట..!!
కన్నులారా చూసుకొంది..
ముద్దులాడే సమయాన తండ్రి చీదరింపు మనసును విరిచేసింది..!!
జాలిగా ఓ చూపు అలా విసిరేసింది..!!
..
..
కలలెన్నో కన్నది..
లోకంలో ఎత్తులను తన మునివేళ్ళతో కొలవాలనుకున్నది..!!
ఆ ఆశలకు చరమగీతం రూపంలో
పెళ్ళి వార్త ఎదురైనది..!!
మూడు ముళ్ళ బంధంలో అల్లుకన్నది..!!
ఆ కలలన్ని చిత్తు కాగితాల్లో రాసుకున్న పిచ్చి రాతలైనవి..!!
..
..
వివాహ బంధాన్ని..
వైఢూర్యం వలె..
అపురూపంగా.. అమూల్యంగా..
చూసుకుంటున్నది..!!
ఆ బంధానికి ఫలితం ప్రేమనుకున్నది..!!
భర్తను గుండెలో నింపుకున్నది..!!
ఇంతలో..భరించువాడు అతడు కాదని..
భక్షించువాడు అతడని తెలినది..!!
భరించడం ఆమె వంతు అయినది..!!
..
..
కలిగిన సంతానాన్ని..
కంటికి రెప్పలా కాపాడి..
తన అమృతతుల్యమైన మమతతో..
లాలించి పెంచినది..!!
పెంచిన ఆ సంతానమే...
తనను బరంవంటారని...
వంగిపోయిన తన తనువుకు
చేతికర్రలా ఉండవలసినది..
చేతులెత్తేస్తారని తెలియలేదు..!!
ఆమెకు ఎరుక లేదు..!!
..
..
జీవితంలో ప్రతి అడుగు..
ఒక పరీక్షలా ఉంటే..
చలించక..
పాసు మార్కుల కోసం..
కుదిరితే డిష్టింన్షన్ కోసం..
అదే ప్రేమ అనే ఫలితం కోసం..
కష్టపడే ప్రతి ఒక్క ఆడదానికీ సలాం..!!
- మీ లక్ష్మి
పెళ్ళికి అర్థం తెలియని..
ఇద్దరు మనుషులు కలసి..
కాపురం మొదలెట్టారు..
కలవని మనసుల గోడును వినక..!!
కలిసిన శరీరాలు మరో శరీరానికి
జన్మనిచ్చాయి..!!
ప్రేమంటే తెలిసిందో లేదో కానీ..
సుఖానికి అర్థం తెలిసుంటుంది..!!
ఆపై అలవాటైపోయుంటుంది..!!
ప్రాణం పోసిన ఆ బుల్లి శిశువుని
పెంచడంలో...పోషించడంలో...
ఓ చిన్న మాట సైతం కనుమరుగైంది..!!
అనురాగం రాకూడని అతిథయ్యింది..!!
"సంసారం" అనే కర్మాగారపు ఉక్కు గోడల నడుమ..
ఉక్కు యంత్రాలే ఉంటున్నాయి..!!
కాలం గడుపుతున్నాయి..!!
లాభాలుగా సంపదలొచ్చాయి..అవి కంటికి కనబడుతున్నాయి..!!
పూడ్చలేని నష్టాలై ప్రేమానురాగాలు మిగిలాయి.. అవి అగుపించకున్నాయి..!!
..
..
ఇది ...
పెళ్ళి అనే కాంట్రాక్టుతో ముడిపడి...
సంసారమనే కర్మాగారంలో కష్టపడుతోన్న రెండు యంత్రాల జీవితం..!!
- మీ లక్ష్మి
శివుడవు...
మమ్ము కాచేవాడవు..!!
గురుడవు...
అజ్ఞానాంధకారము తొలగించువాడవు..!!
శంకరుడవు...
అశుభము దరిజేరకుండ చూసేవు..!!
భవుడవు...
భక్తి భావము మాకు కలిగించేవు..!!
భూతనాధుడవు...
మమ్ముల దయతో కరుణించేవు..!!
రుద్రుడవు...
పాపముల నాశము కావించేవు..!!
...
...
ఇక మాకు తల్లివీవు..తండ్రివీవు..!!
గురువీవు...ప్రభువీవు.. దైవం నీవు..!!
సకలము నీవు.. సర్వము నీవు..!!
ఓం నమః శివాయ..!!
- మీ లక్ష్మి
దొంగ అందురు నిన్ను...
పాపముల హరిస్తావని ఎరుగరయ్య..!!
మాయ సేతువు అందురు నిన్ను...
దుఃఖములను మాయము సేతువని తెలియరయ్య ..!!
మోసాగాడు అందురు నిన్ను...
మోసములు కావవి లీలలని కాంచరయ్య..!!
స్త్రీలోలుడందురు నిన్ను...
కామము నిన్నంటదని ఎరుగరయ్య..!!
గోవులను కాసెదవందురు...
ఈ లోకములనే కాతువని తెలియరయ్య..!!
పాండవ పక్షపాతి అందురు...
ధర్మ పక్షపాతిగ నిన్ను చూడలేరయ్య..!!
ఎంతవారలైన నీ అసలు రూపము ఎరుగరయ్య ..!!
ఇక నిను తెలియ నేనెంత దాననయ్య...!!
- మీ లక్ష్మి
ఏ తీరు వర్ణించను స్వామీ ..??
నిన్నేతీరున వర్ణించను..??
నర జన్మ ఎత్తి సత్యాన్నే మోసితివి..!!
ధర్మానికి రూపువై సంచరించితివి..!!
కష్టాలను ఆలింగనము చేసి..
చిరునవ్వులు రువ్వితివి..!!
...
...
రామా..!!
రాక్షసుల జంపితివి..
సుజనుల రక్షించితివి..
వనవాసమును కూడా ఆనందముగ గడిపితివి..!!
నీ ఇంతి సీతమ్మ దూరము కాగా...
కన్నీరైతివి..!! ఆమె జాడ కొరకు వెతికితివి..!!
అంజనీ పుత్రుడే ఆమె ఆచూకీ చెప్పంగ..
కృతజ్ఞత తెలియ ఆతని హత్తుకొంటివి..!!
వానర సైన్యము, లక్ష్మణ స్వామి తోడ లంకను గూల్చితివి..!!
రావణుని కడతేర్చి శుభముల కలిగించితివి..!!
అయోధ్యకు రాజైతివి.. చక్రవర్తివైతివి..!! అయినా జనులకు నే సేవకుడినంటివి..!!
...
స్వామీ...
రాజ్యధర్మము కొరకు..
ప్రాణమైన జానకిని విడిచితివి...!!
లోలోన ఎంతో కుమిలి కుమిలిపోతివి...!!
యాగము సేతివి స్వర్ణ సీత తోడ..!!
అయోనిజ సీతమ్మ అమ్మ వడికి చేరిపోగా..
లవ కుశులకు రాజ్యమిచ్చి నీవునూ..
వైకుంఠము చేరితివి..!!
...
మర్యాదా పురుషోత్తముడివై...
అందరి హృదయములలో నీవు నిలిచితివి..!!
అన్నైనా..కొడుకైనా..శిష్యుడైనా..భర్తైనా.. ప్రభువైనా..
నీలా ఉండాలని అనుకునేట్లు చేసితివి..!!
రాముడే సకల గుణాభిరాముడని మేము కీర్తించగా..
గుండె గుడిలో కొలువైతివి స్వామి..!!
నీకు పూజలు సేయ ఎంత భాగ్యమో స్వామి..!!
మా సీతారామ స్వామి..!!
-మీ లక్ష్మి
అస్థిత్వాన్ని మింగేసే రోగమే ప్రేమైతే...
నిన్ను సైతం నీకు మిగలనివ్వని మహమ్మారి ప్రేమైతే...
తప్పు చేయకున్నా తప్పే చేశావన్న భావన కలిగించేది ప్రేమైతే...
దోషం అంటని నీకు దోషమాపాదించేది ప్రేమైతే...
చిన్ని తప్పిదానికి లోకమే తలక్రిందులు చేసేదే ప్రేమైతే...
అది తప్ప వేరే లోకమే ఉండకూడదని శాసించే ప్రేమైతే...
దేవుని కంటే తానే గొప్పవ్వాలని తలలెగరేసేది ప్రేమైతే...
అలాంటి ప్రేమకి జీవితంలో చోటు ఉండకూడదు..!!
అసలు అది ప్రేమే అయ్యే అవకాశం ఉండి ఉండదు..!!
ప్రేమ ముసుగులో ఆధిపత్యం అయ్యుంటుంది..!!
ఆత్మాభిమానాన్ని తినేసే క్రూర జంతువు అయ్యుంటుంది..!!
- మీ లక్ష్మి
నీ బాధ నా మనసుకి తెలియాలి..
మరి నా బాధ ఏ మనసుకి తెలియాలి??
నీ కష్టాన్ని నేనెదురుకోవాలి..
మరి నా కష్టాన్ని ఎవరు ఎదురుకోవాలి??
నీ అలసటకి నేను విశ్రాంతి కావాలి..
మరి నా అలుపుకి ఊరట ఎవరవ్వాలి??
నువ్వంటే నేను తెలుసుకొని మెలగాలి..
మరి నేనంటే ఏమిటో ఎవరు తెలుసుకోవాలి??
...
...
నీకై నేనన్నీ అవ్వాలి..
మరి నాకన్నీ అయి ఎవరుండాలి??
నీ తోడు నేనవ్వాలి..
మరి నా నీడ ఎవరు కావాలి??
...
...
నేను నీకోసం అన్నీ చేస్తాను..
మరి నాకై నీవేదైనా చేయలేవా??
బాధ్యత బరువు నాకేనా..
కొన్ని అయినా నీవు మోయలేవా??
నీ భారం తేలికవుతుంది..
మరి నా భారం నీవు తగ్గించలేవా??
...
నేనో అడుగేస్తా..
నీవు కూడా ఓ అడుగేయ్ మరి..!!
- మీ లక్ష్మి
