చెడు పిలుస్తోంది

చెడు తలుపులు తెరిచే పెట్టింది...
రారమ్మని...!!
అయస్కాంతంలా లాగుతూ ఉంది...
నీవు మంచి వైపుకి పోరాదని...!!
వెళ్ళిపోతావా తలుపు తెరిచుందని..??
ఆకర్షణకు లోనవుతావా అది అయస్కాంతమని..??
ఆగమని నీ పాదాలకి చెప్పు...!!
అటు పోవద్దని నీ మనసుకి చెప్పు...!!
లొంగావా... నీ పయనం సాగేను పతనం వైపు...!!
దానికి వశమయ్యవా...నీ నడక సాగేను నరకం వైపు...!!

- మీ లక్ష్మి

జ్ఞాన దీపం

దీపం వెలుగును దాచేయదు...
తన ప్రకాశాన్ని అంతటా ప్రసరిస్తుంది..!!
వృక్షం తన ఫలాదులను ఇవ్వక మానదు...
నీడనిచ్చి సేద తీర్చి ఆకలి కూడా తీరుస్తుంది..!!
నది తన ప్రవాహాన్ని ఆపబోదు...
గలగలా నిరంతర స్రవంతి అయి దాహార్తి తీరుస్తుంది..!!
గాలి ఏ మూలనో నక్కి ఉండదు...
నిరంతరం నలు దిశలా వీస్తూ ఊపిరై నిలుస్తుంది..!!
...
...
మరి నీ వద్ద ఉన్న జ్ఞానం దాస్తావేమి...??
ఆ జ్ఞాన ప్రకాశాన్ని పిడికిట బంధిస్తావేమి...??
అప్పుడు..
నీవు జ్ఞానమున్న అజ్ఞానివి...!!
వివేకుణ్ణి అని నీవు అనుకున్నా.. మూర్ఖత్వానికి ప్రతిబింబానివే..!!
...
...
నీవొక జ్ఞాన దీపమై వెలుగొందు...!!
నీవొక విద్యా వృక్షమై ఫలములివ్వు...!!
నీవొక నదిలా ప్రవహించి జ్ఞానం కోసం పరితపించు వారి ఆర్తిని తీర్చు...!!
నీవు చల్లని పవనమై నీ విద్దెలను నలు చెరగులూ చేరేలా చూడు...!!

- మీ లక్ష్మి

ఇంటి పేరు

ఇంటిపేరు నీ నుండి వేరైతే...
నీ గుర్తింపు ఏమిటి...??
నీకున్న ప్రతిష్ఠ ఏమిటి...??
ఈ పై ప్రశ్నలు పడగలు విప్పి...
నీ ఎదుట నిలువక మానవు...!!
ఆ ప్రశ్నలకు సమాధానం..
నీ వద్ద ఉన్నదో లేదో...!!
లేకుంటే సమాధానం కోసం...
వెతుకులాట సాగించు..!!
నీ అస్థిత్వాన్ని శోధించు..!!
నీకంటూ ఓ పేరుందని నిరూపించు..!!
ఎ‌వరో వేసిన బాటలో నడవడం కాదు...
నీవు నడిచే దారి నలుగురి గమ్యాలకు..
దారి చూపేలా చేసి చూపించు...!!
నీలా మారాలని ఎందరో అనుకునేలా నిలిచి చూపించు...!!

- మీ లక్ష్మి

మనసులు కలవని బంధం

మనసులు కలవని బంధం..
అది ఒక బంధమేనా...??
బలవంతపు సంబంధం..
కలకాలం నిలిచేనా...??
సర్దుకుపోదాం అనుకుంటూ..
సాగే పయానాలెన్నో...!!
ఒకరికి ఒకరై నిలువలేక..
సతమతమయ్యే హృదయాలెన్నో...!!
అలా బ్రతికే అందరకీ నా ఈ మనవి ఏమనగా...
అతనేంటో ఆమెరిగి...
ఆమేంటో అతనెరిగి...
అమే అతనై...అతనే ఆమై...
కలసి మెలసి మెలగాలి....!!
ఒకరి హృదయం మరొకరుగా...
ఇరువరూ ఒక్కరుగా...
సఖ్యత తోడ ఉండాలి...!!
మొదట కష్టమే...
దానిని ఇష్టముగ మలచి...
సంసారమను సాగరమును..
కలసి మధించి...
ప్రేమ అనే అమృతమును పొందాలి...!!
లేదా ...
ఆ కష్టాన్నే మోస్తూ...
అనురాగం లేక.. అనుక్షణం చస్తూ...
కేవలం సమాజం కొరకే జీవించాలి...!!
కాదు కాదు నటించాలి...!!
జీవితంలో విషమే నింపుకోవాలి...!!
మీకు ఏది కావాలి...??
విషమా...?? అమృతమా...??
మీరే నిర్ణయించుకోవాలి...!!

- మీ లక్ష్మి

భగవంతుడు ఏం ఇచ్చాడు??
..
..
ఈ ప్రశ్న వేస్తే..
నేను చెబుతాగా...
ఎన్నో చేయటానికి నీకు ఈ శరీరాన్ని...
నీకు తోడుండడానికి ఇంకా ఎందరో మనుషులని..
అందాలు నిండిన ప్రపంచాన్ని...
ఎన్నో వింతల్ని విశేషాలని...
మంచి చెడుల్ని...
సుఖ దుఃఖాల్ని...
చెడుని దుఃఖాలని దూరం చేసుకొనే శక్తి యుక్తుల్ని...
ప్రేమని ఆప్యాయతలని...
ద్వేషాన్ని .. దాన్ని సైతం గెలవగల ఓరిమిని...
ఇంకా ఎన్నో...!!
చెబితే...సాగరమంత ఉంది...!!
ఊరకుంటే తప్పవుతుంది...!!
ఆయన క్షమిస్తాడని ఆశిస్తూ...
ఆ పరంధామునికి దండాలు...!!
ఆ ఈశ్వరునికి జేజేలు...!!

- మీ లక్ష్మి

చీకట్లు నిండిన ప్రపంచాన్ని ఉషస్సు పలుకరించునట్లు...
మోడుబారిన వృక్షం చిగురు తొడుగునట్లు...
క్షామం నెలకొన్న భూమిని వాన చినుకు తడుపునట్లు...
జీవితంలో వచ్చిన దుఃఖాన్ని కూడా ఒకనాడు సంతోషం చెరిపేస్తుంది...!!
కష్టమనేది ఉంటే .. సుఖం దాన్ని ఓ రోజు తరమేస్తుంది...!!
వేచి చూడాలంతే...!!

- మీ లక్ష్మి

మనిషివా...??
లేక మృగానివయ్యావా...??
మంచి చూడలేవు..చేయలేవు...!!
ఒకరికి హాని చేయుట అలవరచుకున్నావు...!!
నమ్మకానికి విలువనివ్వవు...!!
కన్నీటికి విలువ కట్టాలని చూస్తావు...!!
అంగడిలో దొరికే వస్తువుల్లాగా...
ఇతరుల మనోభావాలను లెక్క కడతావు...!!
బంధాలను అవసరాలతో ముడిపెడతావు...!!
న్యాయమెటూ చేయలేవు...
అన్యాయానికి ప్రతినిధివవుతున్నావు...!!
వేరే శత్రువులెందుకు నీకు...
అరిషడ్వర్గాలను నీవే పెంచి పోషిస్తున్నావు...!!
హింసని పెంపొందిస్తూ...రాక్షసుడివవుతున్నావు...!!
ఇక నీవు మనిషివి ఎలా అవుతావు..??
అసుర ప్రవృత్తికి ఆలవాలమవుతున్నావు...ఇక మానవుడివెలా అవుతావు...??
కావు కానే కావు...!! మానవత్వానికి తిలోదకాలు వదిలావు...!!
నీవు మనిషివి కానేరవు...!!

- మీ లక్ష్మి